عشقت يا الويلان بنتن جميله
هوى نقا ما هو هوى يمين ويسار
تبيني وأبيها سنين طويلة
وأخذت انا مع ناعس الطرف مشوار
حلفت أنا ما حط وحده بديله
وهي حلفت سواي ماعاد تختار
لكن ولي الأمر ما فيه حيلة
عيا علي العود والوضع منهار
وأرسلت جاهه من كبار القبيلة
والعود رأسه يابسن كنه أحجار
قلت أقنعوه وكل مالي يشيلة
اعطوه اللي يبيه لو كان مليار
وقالوا لي ان العود عليه ميلة
ما يقنعه درهم وليره ودينار
واليوم يالويلان ويش الوسيله
أبي المشورة ياصليبين الاشوار
كاني خطفت الزين بتصير عيلة
واصير مجرم واتعرض للاخطار
ويحكم عليه من أصحاب الفضيلة
ولو اعتذر ما يفيدني كثر الاعذار
وكاني تركت الزين حالي عليله
واونس بقلبي تقل مثبوت مسمار
من عنده يالويلان حلن وحيلة
يفزع معي تراي بالوضع محتار
وجدي عليها وجد راع الكحيله
اللي خذوه القوم بالموقف الحار
وكلن على ما قيل يلقى حصيلة
قدامه الجنة قدام النار
الشاعر /سويلم بن مريبد الجعفري العنزي
ليست هناك تعليقات:
إرسال تعليق