الا واوجودي شفت خلي و مر و فات

الا واوجودي شفت خلي و مر وفات

مر وتعدى ولا وقف ولا سلم

ويشر بخدن يوتلع كنه اللمبات

هي الكهرباء و البيت من دونها ظلم

ياليت اهلها يعطون و اعطيهم الشيكات

و جميع الرصيد فداه و بيديه يتسلم

يابن سماح اونست بالقلب خله والقلب من بين المعاليق مختل

يابن سماح اونست بالقلب خله

والقلب من بين المعاليق مختل

اضحك و اجامل مير بالقلب عله 

وجسمي مريضن تقل صايبني السل

اليا ذكرت ام العيون المضله

عروق قلبي و المعاليق تنتل

ام اشقرن على متونه تفله

اشقر و ناعم فوق الامتان ينفل

يالله عسى حالي و مالي فدن له

حالي و مالي كل ابوهن له بحل

يابيت وين الصاحب اللي سكن فيك من لي ثلاث شهور ماشفت زوله

يابيت وين الصاحب اللي سكن فيك

من لي ثلاث شهور ماشفت زوله

كهربك طافي ليه منهو مطفيك

من عقب ماهو منورن للي حوله

والبيت جاوب حال من دون تشكيك

يقول خلك يافتو راح جوله

قلت اخبرن يابيت عله موصيك

بالله قلي سافرت لأي دوله

قال الخبر في صاحبك سجل الشيك

في صالة المطار يوم احجزوله

تنحرت خيطان اخبرك و انبيك 

تبي الكويت من الرياض محيوله

و من عقبها كثرت علي الدواكيك

و اونست من لوعات بقعى ميوله

و يابيت عقب الزين مامن حلا فيك

يومن انها خلتك بنت الرجوله

عساك بالهدام بالقاع يرميك

وعسى الدركتن كل ساسك يزوله

ماكل من يضحك بوجهك صديقك يضحك و قلبه فيه مثل السوادي

ماكل من يضحك بوجهك صديقك

يضحك و قلبه فيه مثل السوادي

يضحك وياضع عثرتن في طريقك

لو ان مابينك و بينه عنادي

واليا سألته قال انا من فريقك

و يامنك احتجته لجا للأعادي

غاية مناه و فرحته يبس ريقك

واليا شافك مستانس يصيبه نكادي

الله يلعن فزعتن مالها ساس // ياصار يفزع لك بليا ضميري

الله يلعن فزعتن مالها ساس
ياصار يفزع لك بليا ضميري

وقت الرخاء يجيك هو اول الناس
ووقت القسى يجيك هو الآخيري

ياشفت زوله قلت هبّاس دبّاس
عليه زولن مثل زول البعيري

بعض العرب والله ماعنده احساس
ماعنده حميا و لا فيه خيري

والذيل يبقى ذيل مايساوي الراس
و ابن القبيله ماهو مثل الخضيري




الشاعر / سويلم بن مريبد الجعفري العنزي

من صار ابن عمه يحاول يدينه // وشلون يدور عز من باقي الناس

من صار ابن عمه يحاول يدينه
وشلون يدور عز من باقي الناس

وقت الرخاء يصير على يمينه
ويشوف نفسه فارسٍ مثل جساس

و اليا طاح له في مشكله مايعينه
ثم يختفي ماعاد تسمع له احساس

و من دور الفزعه على من يهينه
يعرّض نفسه للخسارة و الأفلاس

وترى حلاة الحق يوخذ بحينه
و من مايدوس عداه لابد ينداس

وترى الشجيع اللي عزومه متينه
ياطى على روس الثعالب و الأبساس

و الموت لا يمكن يجي قبل حينه
ياصار مالله كاتبن قبض الأنفاس

و من قرّب آجله ماتمدد سنينه
عند الولي مكتوبن اجله بمقياس

وصلوا على اللي مرقده بالمدينه
شفيعنا يوم ان الأرياق يبّاس




الشاعر / سويلم بن مريبد الجعفري العنزي

البارحه مااحدن درى وش حصل لي يوم اني انا ابعدت عن لمة الناس

البارحه مااحدن درى وش حصل لي
يوم اني انا ابعدت عن لمة الناس

معي كتاب الله واقراء و اصلي
واعوذ بوجه الله عن كل وسواس

ونعست و اثناء النوم واجهت خلي
عليه له عينن تقل عين قرناس

ويوم اني شفته قمت ارحب و اهلي
نسيت كل الخوف ماعندي احساس

قالت علامك ياسويلم مولّي
وش بلا براطمك يالقرم يباس

و انا اول اخبرك وجهك يسلّي
علمني بالموضوع ياعل ماباس

قلت الوباء في كل ديره مفلّي
وفريسته مايضربه غير بالراس

واليوم حلي ياهوا البال حلّي
وانتبهي لايجيك قطاع الآنفاس


 الشاعر/ سويلم مريبد الجعفري العنزي

قصيدة طريفة #الحجر-المنزلي

قصيدة طريفة #الحجر-المنزلي بسبب مرض كورونا حمانا الله و إياكم جميعا من كل الشرور


ليّه عشرة ايام بالبيت محجور
ماعاد افرق شمسها من قمرها

امشي مع الأسياب و الف و ادور
ومعزبتي مااختفي عن نضرها

وتقول لي لاعاد تطلع من السور
لا تصير مثل اللي حياته دمرها

وتراك ياابو فلان منهي و مامور
عليه يالاجواد ربي نصرها

اطبخ و هي تطبخ و نمشي على الدور
الله حشرني يوم ربي حشرها

وابشتغل معها و عساي ماجور
واصبر على زين السنين و قشرها

وبعض العرب عليك يلف ويدور // يبي يضرك لو دفع من حلاله

بديت بسم اللي هدا الناس للنور
الواحد المعبود جل جلاله


نزل كتاب الحق للخلق دستور
ونبينا بدا بنشر الرساله

وبعض العرب عليك يلف ويدور
يبي يضرك لو دفع من حلاله

ولو قلت له غطان مايمسع الشور
النذل مايتوب عن النذاله

يحسبه مع الحق لكن مغرور
يبي يضر عداه على جهاله

ولكن راع الحق تراه منصور
والله ما ينضام لو هو لحاله

واللي ماهو مع حق لو معه جمهور
والله مايشوف غير الفشاله

وبعض العرب لو تستره ماهو مستور
للناس بلسانه يبيّن خماله

وبعض العرب مسكين يشهد على زور
وماقال له خصمك من علوم قاله

يقوده خصمك للمحالكم تقل ثور
وين الشهامه و الوفاء و الرجاله

ضعيف واظنه على الوضع مجبور
ومن ضعف ذاته مايتصرف بحاله

والله مايصبر على الحيف والجور
الا الردي و ابن الردي و الحثاله


 الشاعر/ سويلم مريبد الجعفري العنزي

ياصار جدك ذابحن له ملايين وش بلا جدك ماذكوره الجماعة

ياصار جدك ذابحن له ملايين 

وش بلا جدك ماذكوره الجماعة

من خلقت جدك ماذكر له براهين 

مايعشي نفسه يوم وقت المجاعه 

واهلك ماهم من الرجال المسمين 

ولاهم من اهل المرجله والشجاعه

ولا يصلح تسوي لجدك دواوين 

لاصار ماجدك طويلن ذراعه 

ابوك وجدك كل ابوهم مساكين

رعاعتن عقب بدالة رعاعه

ماتستحي من الكذب يابارد العين

ياصار مالك بالفعول استطاعه 

والناس تعرف الناس اول وهالحين

وكلن يعرف ويش نوع البضاعه 

نوع الذهب به فرق عن البليتين

ومن معدنه تاي ون مابه طماعه

 الشاعر/ سويلم مريبد الجعفري العنزي

بعض العرب يلسن كما يلسن الداب

اليا انظلمت ازبن على رب الارباب
الواحد اللي كل عسرن يحلّه

هو الذي بالخير يفتح لك الباب
وهو الذي يمنعك عن كل زلّه

الواحد اللي من ترجاه ماخاب
ياحظ من يظلله تحت ظلّه

ومن يطلب المعبود الدعوته جاب
ويغفر ذنوب العبد دقّه و جلّه

والمسلم يامنّه لرب الملا تاب
بإرادة المعبود ينظف سجلّه

بعض العرب يلسن كما يلسن الداب
مريض قلب الخبث عنده جبلّه

بين الأوادم بس يسعى بالأنشاب
ونقل السوالف بينهم عادةٍ له

ان جاك في مجلسك وراك الأعجاب
و ان جاء عدّوك قام سيفه يسلّه

الردي ماينفعك ان حضر و ان غاب
كل الكلام المقتدي مايدلّه

هذاك يا علّه بقطّاع الأرقاب
سيفن على حد العلابي يتلّه



 الشاعر/ سويلم مريبد الجعفري العنزي

ياولدي ياسلطان قم شغّل الجيب/ نبي على طريق حايل نتلّه

بديت باللي يعلم السر والغيب
رب العباد وغافرن كل زلّه

يالله ياقابل دعاء العبد و مجيب
يالواحد اللي كل عسرن تحلّه

طالبك عفوك ياقوي المقاضيب
ياخالق المخلوق من كل ملّه

انك تجنبني عن الذنب تجنيب
و بالأخره تظللن تحت ظلّه

و ياولدي ياسلطان قم شغّل الجيب
و تأكد ان الجيب مافيه خلّه

شف المكينه و الهوا للدواليب
ومحركاته الجيب دقّه و جلّه

و اليا فحصت الجيب عن العذاريب
من المحطة تانكيب الجيب ملّه

ثم خلك جاهز ياعطيب المضاريب
نبي على طريق حايل نتلّه

بالليل نمشي عن سموم اللواهيب
حتى لو انّا نسري الليل كلّه

وصل رحم نبي نزور اهل الطيب
و جميع غالي ناصله في محلّه

زيارتن مالي وراها مطاليب
الا اصل الارحام و ابرضي الله

ولا ودنا تكليف على المعازيب
ناخذ لنا فنجال من جوف دلّه

عند اهل حايل كاسبين المواجيب
واحدهم لو تقعد شهر ماتملّه

و من عندهم نبي نكلّف مناديب
ولا نمشي الا كل بيتن ندلّه


 الشاعر/ سويلم مريبد الجعفري العنزي

مدح - فريح بن غريب بن زعل- يابو محمد طيّب وطيبك على ساس

قصيدة مدح لآخوي و ابن عمي  فريح بن غريب بن زعل (ابو محمد)الله يحفظه هو واخوانه
من الشاعر سويلم بن مريبد الجعفري و يستاهل


يابو محمد طيّب وطيبك على ساس
و انشهد انك كاملن بالرجوله

ياعل يفدونك كثيرن من الناس
يابطل ياللي تستحق البطوله

مع الاوايل دايمن تاخذ الكاس
ومن عادتك تاخذ مع الطيب جوله

انشهد انك دايمن ترفع الراس
والطيّب مثلك ما نتجاهل فعوله

واهلك قبلك يوم الأرياق يباس
كم واحدن بالكون خذوا ذلوله


الشاعر/سويلم مريبد الجعفري العنزي

ترى الردي اليا رفعته يوطيك ادعس على علباه لو كان شايب

اليا زعلت ازعل و علمني ارضيك
اشرح لي عن زعلك ويش السبايب

والله اني ماازعلك و انا بناخيك
واني غير احتميك حاضر وغايب

و كنك زعلان بلا سبب قلت وش فيك
انا خصيمك لو تزيد المصايب

بعض العرب في كثرة الهرج يوذيك
يجيك بعلومن كبار و غرايب

اليا مدحوك الناس مايبي طاريك
ايولع الفتيل بين القرايب

ترى الردي اليا رفعته يوطيك
ادعس على علباه لو كان شايب

اليا غبت ينقر بك كما ينقر الديك
وبحضورك يستجبن لعين الصلايب

تراك اذا مادست راسه برجليك

يوذيك في كثر الحجج و النشايب

الشاعر/سويلم مريبد الجعفري العنزي

قصيده غزليه // ملت عيوني من كثير المراعاة

ملت عيوني من كثير المراعاة
انظر للي بابه على قطر بابي

انظر للي بالبيض ماشفت حليات
ولاشفت انا مثل غضيض الشبابي

اللي ليا منه ضحك تذبح شفاه
و الخد كنه مصحف ٍ للكتابي

والعين عين اللي على الوكر شفناه
مايرقب الا فوق روس الهضابي

مثل الغزّيل والغزّيل حلاياه
يشدى لخشفٍ بأوسط البر رابي

انشهد انه تل قلبي من اقصاه
وانشهد ان الترف جدد صوابي

حاولت ابصبر و ابي ادله و ابنساه
ولكن حدث بالضمير اشتبابي

الله يجيب اللي نحبه و نبغاه
وتهون امري ياممشي السحابي


الشاعر/سويلم مريبد الجعفري العنزي

ياصار مالرجال يمدح و هو حي ماينفع الرجال مدحه ليا مات

ياصار مالرجال يمدح و هو حي

ماينفع الرجال مدحه ليا مات

لا صار ماله سمعتن كنها الضي

والطيب بمحياه يرسم علامات

وذكره يخلد له مثل حاتم الطي

قول وفعل بالصدق ماهي دعايات

و مدحن مهو صحيح يرجع ولا شي

المدح مايجوز ياكود باثبات

ياصار ماينفع لا بهذي ولا ذي
مدحه حرام و عيب يااهل الجمالات

وبعض العرب يمدح وهو مذهبه سي

و اللي مدحه يمدح على شان غايات

واليا مدحه ولا حصله من شي
اصبح يسبه عند كل القروبات

واللي مدحه بالكذب يحتاج له كي
لآنه مريض ونوب تجيه حالات

والناس تعرف وش الناجض من الني
وكلش يبين عند فحص الآشاعات

الشاعر/سويلم مريبد الجعفري العنزي

جعافره يستاهلون الزعامه

سلام ياللي الطيب لهم علامه 

اللي لهم في مركز الطيب قيمه

اهل الكرم والطيب واهل الشهامه

تلقى الكرم عند الوجيه الكريمه

المحترم يفرض علينا احترامه 

وفهم المعاني لرجال الفهيمه

يوم المعارك يحتمون الجهامه 

شجعان من عصر السنين القديمه

مطارده ياسعد منهم حزامه

لو زاد حجم الكون ماحدن يضيمه

للحرب حرب ولسلامة سلامه 

وعدونا منا يذب الخريمه

والمرجلة ماهي بكبر الجسامه

كم واحدن جسمه كبير وبهيمه

وحنا شعار الحرب نلبس وسامه 

نحب الموت ولا نحب الهزيمه

وحنا الجمل ماناخذ الا سنامه 

اليا اقتسمنا عند وقت القسيمه

جعافره يستاهلون الزعامه 

من فعلهم ياما خذو من غنيمه

وعدونا مايهتني في منامه 

لو هو عديم تجيه ناسن عديمه

وطيب عنزة يبقى ليوم القيامه 

والطيب لهم عادتن مستديمه

وكل القبايل دوم لطيب هامه 

بفعولهم يبنون للمجد خيمه

ولا خير باللي مايثمن كلامه 

نقول الحق ولا نقول الضليمه 

الشاعر/سويلم مريبد الجعفري العنزي

ابنصح اللي باللقاء ينطح القوم

ابنصح اللي باللقاء ينطح القوم
لاياخذ الا من بنات الحمايل

بنت الرجال اللي لهم فعل وعلوم
اهل المكارم من جميع القبايل

في نسبهم تبقى معزز و محشوم
وتعد من ضمن الرجال الآوايل

و على الردي و بنت الردي ما انت ملزوم
بنت الردي مامن وراها حصايل


الشاعر سويلم بن مريبد الحبيب الجعفري العنزي

يقدر الرجال على فعوله

بديت بسم اللي العباد ركعوله
الواحد اللي يعلم السر و الغيب

نزّل كتاب الدين على رسوله
ووضح كتابه كل شيٍ بترتيب

والصقر ياخذ له مع الجو جوله
ولايسكن الا فوق روس المراقيب

الصقر صقر بالطلوع  ونزوله
سون على الصيده شطير المخاليب

و يقّدر الرجال على فعوله
ولا يقدّر على شان وجهه غدا شيب

ولايقدّر على شان عرضه وطوله
يقدّر اللي قايمن بالمواجيب

بعض العرب يفتك من كان حوله
من دون ربعه يلتهب كنه الذيب

مشاكل ربوعه تصير محلوله
يحلها لو كان يدفع من الجيب

هذا هو اللي يستحق البطوله
قول وفعل مافيه شك ولا ريب

وبعض العرب مايمشي الا بعموله
ولا وده ان المشكله تنتهي طيب

وعنده ضعوف اليا صفق صفقوا له
عند الردى صواب والطيبه عيب

و لا يضد عداه يبي ينوله
مضرته لعداه شذب العراقيب

هذاك عسى الله يشتال زوله
وبالاخره يشوى بحّر اللواهيب

وبعض العرب لو قال مايفيد قوله
لو قال قوله لا يودي ولا يجيب

يصادقك ياصار عندك سيوله
و ان ماعطيته صرت كلك عذاريب


الشاعر سويلم مريبد الحبيب الجعفري العنزي

بعض العرب مايعرف العدل و الميل

بعض العرب مايعرف العدل و الميل

معهم عليهم دون عرف القضيه

ان قلت له نهار يقول لك ليل

و سوالفه مهي على حسن نية

وبعيونه ان النمله اكبر من الفيل

و بقوله ان الفيل اصغر شويه

مايقتنع لو جوه عشرة رجاجيل

رايه هو الصحيح ميه بميه

هو مهبول وضيعوه المهابيل

يامر وينهى تقل قايد سريه

مافيه مثله شيخ يوجد بهالجيل

ويشوف نفسه من شيوخ السميه

متعبن حالة بس يحط ويشيل

من دون يعرف الطيبه و الرديه

والصقر غدا اليوم ماعاد به حيل

واستشيخت على العقاب الحديه

هذا الكلام اللي نظمته بتفصيل

ولا لي بتبيين العلوم الخفيه

الشاعر سويلم بن مريبد الحبيب الجعفري العنزي