الاوله زلت رفيقي تحملت
عند الخطا ما احاسبه عن كلامه
لو الخطا واضح صفحت وتجاهلت
ماودي اقع في طريق الملامه
والثانية لو هو تردى تجملت
حتى يتراجع كان عنده شهامه
اصبر على الجاهل ولو عال ماعلت
واحاول اجنب قليل الفهامه
والثالثه ياقاله كلمتن قلت
كلمة قويه تيقضه من منامه
حد المشوك في يميني تناولت
واحط له في وسط وجهه علامه
والرابعه عن بارد الوجه ما سلت
ما عاد ابي شوفه ولا ابي سلامه
لو يتنازل قلت له ماتنازلت
انا عدون له ليوم القيامة
يا صار خصمك فيه لذعة بليتين
ولو ايش ماسويت من طيب ما يشوف
ويشوف نفسه مثل شيخ السلاطين
وان ما شرب دواه يجيه عاصوف
في كل وقت يناصرونه مساكين
وتشوفهم عنده حزابات وصفوف
وله شلتن على سوأياه راضين
ويصفقون ومعهم طبول ودفوف
ما عندهم شيمه ولا عندهم دين
وليا نظرت وجيههم كلها صوف
اهل ردى دايم مع الشين ماشين
ردى ردى ولا يعرفون معروف
عددهم واجد مار ما من حمر عين
ولو يختفي رداه للناس مكشوف
ودعواك تبقى سنين وسنين وسنين
ولا تنتهي دعواك وخصامك ضعوف
والله ما يقهرك غير الفلوًه
مكثرين الهرج لعداك والدبك
اللي مرضهم داخل القلب جوٌه
ابعد عن المرضان لا عاد يعطبك
لا منهم صفوا سوات القطوٌه
والكل منهم وده انه يحاسبك
وان جيت واحدهم غدى تقل بوٌه
وان كان عنده ناس بالهرج ينشبك
على الكلام الشين عنده جروٌه
والكذبة البيضاء يحبك لها حبك
يمشي معك ولاتعرف ويش نوٌه
نوبن صديقن لك ونوبن يحاربك
وياجاك ثم قال سو هذا و سوٌه
نوبن عدون لك ونوبن يصاحبك
ناسن واحدهم ما يناطح عدوٌه
لو تضربه مع خشته ما يضاربك
اهل قبالن شين وأصحاب سوٌه
من يوم تقفي والسوالف بغاربك
والله لولاي خايفن من سموٌه
لا حوشهم حوش الغنم داخل الشبك
لا وا خسارة طيبتي عند الانذال
ادور المربح لكن خسروني
يا كثر ما سلفت وأعطيت من مال
ادور المعروف لكن نسوني
خسران من سلف من الناس دجال
سلفت لي عدة بشر وجحدوني
واعطيت من مالي بتقدير واجلال
يوم أني عطيتهم ما عطوني
اموالي راحت بين كاذب ومحتال
ولو اشتكي للناس ما صدقوني
الله يعوضني على كل أبو حال
والناس عن الطيبة نكلوني
ان صار مالي يسترن يا جمعته
ابجمعه و بستتر عند الانذال
ابشتري هذا وهذاك بعته
واصرف اموالي على كل أبو حال
والطيب كان احتاجني ما منعته
انا معه بالجاه والحال والمال
وجميع من قام ونفعني نفعته
اجيه انا ليا احتاج من دون مرسال
واللي يبي حلقي بخشمه رمعته
ولا تقبل العوجا ليا صرت رجال
واللي يسولف بي وانا ما سمعته
اهل النمايم نقص من ماض الأجيال
ما كل من هلا بقلبه مصافيك
لسانه زين وداخله حقد باقي
يا صرت غايب قام بسهوم يرميك
ويحب خشمك عند وقت التلاقي
بالكلمة الزينة تقل يبي يغريك
وهذي وصوف اهل الخدع والنفاقي
يقولك يا فلان تراي مغليك
ويعطيك من عذب الكلام الدقاقي
ولا منه عرف ويش داخل خوافيك
ثم قام ينشر مثل نشر الزعاقي
لسانه يضحك لك وقلبه معاديك
يبحث عن العثرات والرب واقي
الرجل الطيب مايخلي بناخيه
ويمشي معه في كل حلوه ومرٌه
ان عال عن الدرب لازم يقديه
وينبهه عن كل شين يضرٌه
يصادق صدقانه ويعادي معاديه
ويصير محزم جنب في كل مرٌه
ولا الردي بهيمتن في مفاليه
حين تقل ميت وجوده مغرٌه
مثل البغل دايم كبارن علابيه
تمضي سنين ولا تعدى مقرٌه
هذاك يبيعه وهذاك يشريه
واللي شراه يخسره مايسرٌه
سويلم بن مريبد
يالله انا طالبك في كل ساعة
يا غافرن زلات عبدك ليا مال
عفوك وغفرانك نهار الشفاعة
اجعل لنا في جنة الخلد منزال
وعندي نصيحة و انصتوا لأستماعه
هديتن مني لذربين الافعال
اليا حصل مشكل بصف الجماعة
حاول تسوي خير ياطيب الفال
امش بطريق الخير بالاستطاعة
لو انك تدفع يالسنافي من المال
و ان شفت لك خبلن يرفرف شراعه
ما يقتنع لو ينصحه كل رجال
ويشجعونه ناس على ضياعه
ياما يطق بجبهته حفة الجال
وعقب يتعلّم كيف درب اللكاعة
و من عال يلقى له من الناس عيّال
واللي يطيع مروجين الاشاعة
يستاهل اللي يستمع هرج الأنذال
واللي يغث الناس يلوى ذراعه
حتى يدل الدرب جميع مختال
وبعض العرب ينشر سوات الإذاعة
فلان قال و قال و فلان ما قال
واليا حضر خصمه غدا كالبضاعة
ماينطق الكلمة غدا تقل تمثال
الشاعر سويلم بن مريبد
أبدا بسم الله سبحان.
ربن خلق كل انسان.
ويكون شيئا ما كان.
رفع سبع السماوات.
هو الوالي و المعبود.
من غير الله مانجود.
مهما نفعل من جهود.
هو اللي يحل الكربات.
هو اللي بسط الأرض.
فرشها من طول وعرض.
ذكر السنة، والفرض.
في محكم هدي الآيات.
وبعد تنظيم الأصطار.
أبدا في كلامن صار.
شين يفشل ياستار.
ما حصل في دورن فات.
بعض الجيل الجديد.
قعد بالفساد يزيد.
يمشي على ما يريد.
يشربون المسكرات.
وشوف بعض الشيبان.
يطولون الادقان.
ولكن ما بهم اديان.
لو الحاهم مخضبات.
اللحيه تجي ميترين
وصدرة فاضي مابه دين.
ويخدع الآخرين.
عند البيع والشريات.
واليا صارن عنده بنات.
يخليهن قاعدات.
عنده تقل خادمات.
ما يكرهه ذنب العورات.
يجلسهن مايجوزهن.
ياما الشيطان يهمزهن
ثم يلقن من يغمزهن.
يركبن بالسيارات.
وبعد أيامن قليلة.
يجيك يومي شليلة.
يقول أنا من اشتكي له.
وبناته منهوبات.
ثم زبن على الحكام.
واخذ مري مع خدام.
يقرر ماطا ألاقدام.
ويعمم بالإذاعات.
ويلقاهن بعد أسبوعين.
كل وحده عليها اثنين.
ثم مسكوا الزانين.
وامسكوا الزانيات
وامسكوهن مسكن تام.
ودوهن للسجن العام.
وقرروا لهن اتهام.
وودوهن. للبصمات.
وأرسلوهن للخبير.
يكشفهن. بالنواظير.
يكتب عليهن تقرير.
ويسجل الافادات.
وبعد التقرير المذكور.
يحكم سجن ستة شهور.
في غرفة مابها نور.
مع تشديد الحراسات.
وهذي سلوم الانذال
اللي والله مأهم رجال.
والا الطيب لا يزال.
يحافظ على العادات.
والطيب دايم شريف.
و دايم وجسده نظيف.
مايلقى به سواليف.
دائم وفعوله جزلات.
الشاعر سويلم بن مريبد الجعفري
واجهت لي غيرون بسطح العمارة.
وايق علي وقام يشر بيمناه.
وانا عطيت الزين رمز الإشارة.
سألت انا حلو النبأ وين مرقاه.
ونزل علي اللفت يمي وأداره.
وركبت انا باللفت ياما وصلناه.
ولقيت لي غيرون بخده فناره.
يضوي على كل السطوح بشفاياه.
وقعد على يمناي وأنا يساره
وقمنا نسولف ونتحدث بمعناه.
وسألتها يابنت من اي قاره.
وأنتي من انتي ياهوا البال ومناه.
قالت من السبعان والاسم ساره
وابوي يا بغيت وشفيت تلقاه.
لكن انت قلي ساكنن بإي حاره.
قلت اه . لا يوجد محلن سكناه.
قالت لي عطني قصتك بإختصاره.
وش كثر تحمل من شهادات مبدأه. و
قلت الشهادة سادسه من وزارة.
هذا مسير العلم عندي ومنهاه.
وقالت لي ماتفهم ولا بك نماره.
والسادسه رسن هماجن قضى ماه.
وأنا خذيت الجامعه بالشطاره.
وجميع من يحمل شهادة تحداه.
حنا قديمينن بفن الحضارة.
وأنتم بدوين منزله راس مفلاه.
قلت البدو في روض زينن خضاره.
ياحلو بيت البدو يازين مبناه.
الدله الصفراء يخدر إبهاره
والنجر يناديى للمسير اليا جاه.
ياعل ديرتهم يكثر امطاره.
من مزنتن من عالي الغيم منشاه.
حيث انهم هل الكرم والوقاره.
هل الكرم والطيب والعز والجاه
يكرمون الضيف،يا جاء زياره.
عاداتهم. كسب الجمايل مع الجاه.
سويلم بن مريبد
يابنت ترى حبة العيد قانون.
سنه علينا سيد المرسلينا.
كلن يقوله والمشايخ، يقولون.
مذكور بالقرآن شيء يبينا.
قالت لي خلق عاقلن ماانت مجنون.
جاهتك بالمعبود لاتبتلينا.
بس انت اصبر لين اهلي ينامون
ياناموا الشيبان لازم تجينا
سويلم بن مريبد
الزين ما شفناه من له أسبوعي.
عن البلد غادر لديره بعيدة.
و اتلى الخبر بالزين يوم الربوعي.
يومه ركب فوق البيوك الجديدة.
من عقب نور العين قلة سنوعي
يالله دخيلك عن حياتن زهيدة.
جيت الطبيب اللي يداوي الوجوعي
عطاني علاجاتن ماهي مفيدة.
قال السبايب لك وليفن قطوعي.
و ان ماتركته جتك امراضن عديده
سويلم بن مريبد
دنيا كفى الله شرها ما عجلها.
كم واحدن فيها عليه الدهر مال
وكم واحدن يرحل عقب مانزلها.
هذاك ينزلها وهذاك رحال.
و مادام دنيا الشين تخون اهلها.
لزوم نحذرها ولا نصير جهال.
وصلاة ربي عدا ماطر هملها.
على النبي المبعوث بالحق مرسال.
سويلم بن مريبد
بنتن خذت قلبي بزايد غلاها
انشهد ان الله بحبه بلاني
هي الدوا و انا تراني دواها
ولا يداوي قلبي غيرها شخص ثاني
الله يسعدها و يسعد مساها
كم مرتن من شانها جيت عاني
كلمت ابوها ابي ادور رضاها
لاشك ابوها للأسف ماعطاني
ياليت قلبي ما ابتلش في هواها
و ياليته مريحني بتالي زماني
اقول ياقلب انس ولا نساها
قلب العنا مايطيعني ويعصاني
بديت بأسمك يالولي خالق الكون
ياعالمن مايختفي بالسدودي
انك تمشيني مع الدرب في هون
و تدلني على طريق الركودي
مادام يمدحني من الناس مليون
مايهمني سب الضعيف الحقودي
يا صار ماني فيه يصير ملسون
وينعقد لسانه عند حضرة وجودي
و الهرج مايزعلك ياصار موزون
يزعلك يامنه تعدى الحدودي
و بعض العرب في كثرة الهرج مفتون
لسانه مسلم مير قلبه يهودي
سوالفه هزله و من دون في دون
الله يلعن كل واحد حسودي
اسالكم بالله ياللي تعرفون
هو فعل الحصني مثل فعل الأسودي
ابنصح اللي تجهله بعض الآحوال
ياجب على المسلم قبول النصيحه
الدنيا هذي بين نازل ورحال
لها نهاية مثل وقت الشريحة
و كم واحدن يركض وراها ويحتال
و لو ضحكت له يوم ماهي صريحه
و لو ايش مايركض و يجمع من المال
لابد ما ينقال هذا مطيحه
و ياكثر ماخذت من رجال و رجال
خوذوا حذركم يالوجيه الفليحه
و ياما خذت من عم و ياما خذت خال
يالله عساهم بالجنان الفسيحه
تستقبل الآجيال و تقضي على اجيآل
و الناس بالدنيا ماهي مستريحه
و اسمح عن المخطي على كل ابو حال
لو انه ظالم قله الله يبيحه
و تراك انت الربحان يا طيب الفال
عند الولي تكتب نظيف الصفيحه
الشاعر سويلم بن مريب الجعفري
يا هاتفي سلم على طيب الفال
عبدالله المتعب ليا جيت حيه
اللي بيوته للرجاجيل مدهال
انشهد انه فخر كل السميه
و ابوه وجده عز من ماض الاجيال
طويلعي معروف راعي حميه
سند على يمناك كان الدهر مال
و مواقفه بالطيب ماهي خفيه
ان جيته بالطيب يرفع لك عقال
و ان جيت عكس الطيب عليك سيه
و هاذي عوايد كل ذربين الافعال
عزومهم عند المشاكل قويه
وهذي شهادة حق و الحق ينقال
ومني لأبو متعب سلام وتحية
الشاعر سويلم بن مريبد الجعفري
البارحة عيت عن النوم عيني
اليا بغيت انام جتني كوابيس.
ناسن توادعني وناسن تجيني.
أعوذ بالله من جميع الوساويس.
و اشوف انا الشيطان في كل حيني.
وأشوفني في حفلة الجن عريس.
ناسن تبارك لي وناس تعيني.
وشوفني من مدهم مالين كيس.
ناس لهم صعب المشاكل، تليني
. قبايلن يمشون بقيادة ابليس.
الجن والعفريت متولميني.
اهل المفاخر كاسبين النواميس.
ونسيبي شيخ القوم ذرب اليميني.
إبليس ويلد إبليس من دور بلقيس.
وصورة نسيبي تخلع الغافليني.
عليه. له لحيه مثل لحية التيس
لحية طويلة مار ما فيه ديني.
يا قل ثمرت أهل الوجيه المعابيس،.
تخيروا الأنساب يا الطيبيني.
نسب الشيوخ ولا مناسب هلابيس.
نسب الردي ما ينفعك يالفطيني.
و من ناسب الفاشل تجيه العواكيس
وقعدت انا من النوم تصفق يديني.
في سهلتن ما حولي الا النسانيس.
الله لا يبلاكم ولا يبتليني
قبايلن تعيش خلف الكواليس.
وعليكم بالأذكار يالمسلميني.
تطرد عن المسلم جميع الهلاويس
سويلم بن مريبد
انا ليا منه تعرض لي اللاش
أجنبه ما كن عيني تشوفه
اللي يصادقني إليا شافني كاش
و كل الطمع متمركزن وسط جوفه
وقت الرخاء صديق وبالضيق ينحاش
تجيه اله رجفه ويزداد خوفة
ما ينفع الجبان لو معه رشاش
و لا ينفعه جسمه وكبرة كتوفة
والله ما يشوف لو كان فشفاش
و اليا منه زعل قلت جعله ذلوفه
و من الذهب ما أعطيه لو عندي خياش
لو ايش ما يشكي عليه ظروفه
الشاعر سويلم بن مرعي بن حبيب الجعفري.
يا بغيت تروح رحل للطيبين
الوفي يروح يم اهل الوفى
والرجال أنواع والمخفي يبين
وبعضن منهم يبثون الخفى
الرجال الطيبة متواجدين
و راعي المعروف دايم مايخفى
وانتبه تروح يم الفاشلين
الردي ما بقربته غير الجفى
ينبسط و يرتاح ياشافك حزين
ويزعل ما يرتاح كان جوك صفى
لا تجيهم يا عشير الغانمين
إبتعد يامن واحدهم لفى
وان تكلم كلمتن قل كلمتين
لا يزود هرجته قل له كفى
وأن ماسكت عطه صابر باليمين
بعض الضربات تراها شفى
مع تحيات الشاعر سويلم بن مريبد بن حبيب الجعفري.
قصيدة رثاء للمغفور له بإذن الله بشير بن سماح الجعفري العنزي من الشاعر سويلم بن مريبد الجعفري
الله يرحم من يحبونه الناس
اللي فعوله كل ابوها جزايل
اللي فعولة دائمن ترفع الرأس
متعودن على فعول الجمايل
أمضى حياته طيب فخرن و نوماس
قرمن يحبونه جميع القبائل
بشير بن سماح للطيب نبراس
فقيدتن ينعونه عيال وائل
هذه الأبيات موجهة للأخ سليمان بن عواد باون الغضوري
يالغضوري تستاهل البن والهيل
ياللي على كلمة هلا دوم معتاد
عز الله إنك من خيار الرجاجيل
و انك من اللي طيبهم دوم يزداد
مجلسك مجهز من جميع المعاميل
مفتوح كل الوقت من دون ميعاد
ودائم تهلي بالرجال المقابيل
وكلمة نعم تستأهله يابن عواد
حلحيل و من نقوة رجالن حلاحيل
أنتم لكم بالطيب مصدر و ميراد
غضاوره يا قيل وين اهل الخيل
شجعان يجونك جماعات وأفراد
متوارثين الطيب جيلن بعد جيل
وترفع لكم البيضاء على رؤوس الأشهاد
مع تحيات الشاعر سويلم بن مرعي بن حبيب الجعفري.
هلا باللي لهم معزة و مقدار
اللي لهم بالقلب شيمه و قيمة
آللي من الأقراب و اللي بعد جار
يا مرحبا بأهل القلوب السليمه
يا ما حلا بوجودهم شبت النار
أفرح اليا جوني بليا عزيمة
وأفرح اليا جوني من يمين ويسار
عدي بقصرن كن ماني بخيمه
وترى الرجال اللي لي حزام وستار
يا جوني في بيتي تراها غنيمة
الغانمين الطيبين اهل الكار
فعولهم مع القبايل قديمة
حزام لي في ساعة الموقف الحار
ليا صار جوي صايرن فيه غيمه
انا مع الطيب اليا صار ما صار
طيبن واحد ولا مية لخيمة
مع تحيات الشاعر سويلم بن مريبد حبيب الجعفري.
البارحة عند أبو عمر تقهويت
من دلة المطنوخ خذيت فنجال
من عادة المطنوخ ما يسكر البيت
بطل ولد بطل ويجونه ابطال
والبيت فاتح دايمن رحت و ان جيت
في كل وقت البيت تلقى به رجال
سالم ولد عساف يانعم ماطريت
شهم وشجاع و للمهمات حلال
الشاعر سويلم بن مريبد بن حبيب الجعفري.
هذه القصيدة إهداء إلى ابن العم نزال بن عايد بن صلال الجعفري.
والله ونعمٍ يا مقر الرجوله
ياللي فعولك دائمن ترفع الراس
انت الشجيع اللي تنومس فعوله
أنشهد أنك كاسبن كل نوماس
أبوك عايد و الرجال شهدوله
شهم وشجاع و للمعادين دباس
يوم انها بالهوش يحتل دوله
وطيبكم يا نزال ساسن على ساس
يوم القبائل بين صولة وجوله
ولا فيه لا شرطة ولا فيه حراس
هذاك يستيسر وتوخذ ذلوله
وهذاك مضروبن له بسيف بالراس
وفي ساحة الميدان تجي الزحوله
أما تدوس عداك ولا انت تنداس
مع تحيات الشاعر سويلم بن مريبد بن حبيب الجعفري.
والله ان بعض العرب لو مات
أن موته أحلى من وجوده
عند اللوازم يجي شمات
و عند الرخا يفتل زنوده
واليا منها صارت القالات
الردي ما يحتمي، ذوده
أبوه وجده زمانن فات
أفعالهم، ما هي محمودة
وصفت انا النذل بالابيات
والكل يطلع على جدودة
والرديء صداقاته ضحكات
لكن ما هو عالي الجودة
خاوه على مستوى الكشتات
ولاتبي نقصه ولا زوده
سويلم بن مريبد
سلام يا رجلن نعزك و نغليك
لأنك رفيق وسمعتك ترفع الراس
والله ونعم كل ما حل طاريك
يا الغضوري دايم لك الطيب نوماس
يفرح بك صدقيك ويكره معاديك
والذيب ما يخاف من صوت الابساس
عدوك يا خلف تدوسه برجليك
ولا هو غريب انه على الأرض ينداس
ويشهد بطيبك يابو سلمان ماضيك
وعند الجوائز دائمن تأخذ الكأس
هديتك وصلت عسى الله يعافيك
ولا هي غريبة منك يا طيب الساس
مع تحيات سويلم بن مريبد حبيب الجعفري.
لا تحتزم باللي عزومه رديه
تراك لو تنخاه ما فيه فادة
والردي لا تنصاه في كل هية
تري الردي كل الردى فيه عادة
ليا شفت زوله، قلت ما فيه زيه
لكن بالفعل مايثور زناده
وقت الرخى بالهوش ينطح سريه
ووقت القسى جميع من جاه صاده
انص الرجال اهل العزوم القوية
اللي لهم على المشاكل جلاده
والرجل الطيب مايخلي خويه
لو ان عمره يعترض للابادة
مع تحيات الشاعر سويلم بن مريبد بن حبيب الجعفري.
رد الشاعر سعود الأيدا
قولاً ثمين وقايله به حميه
رجلن حكيم ومنطقه به ركاده
يشره على الطيب الى اخلف نويه
والاالردي يموت مادرك مراده
مثلك ايسامح لويشوف الخطيه
وكلا يحصل مطلبه بجتهاده
ارد العدود الراهيه والرويه
اللي الضوامي ضاريه لرتياده
من فضلكم يا مجمعين الهياطي
لا تدبلون كبودنا بالسواليف
كذبن تقولونه و كذب احتياطي
سوالف تنقال كذبن وتزييف
والدم واصل لين حد الاباطي
وانتم تراكم كل واحد معه سيف
يمضى الشهر ما غير طاطي و طاطي
تقل أنكم من حرروا خط بارليف
مثل العجاج اللي على حد شاطئ
تزفه الأمواج ولكن ماشيف
أنا طالبكم تتركون الخراطي
ولا أحدن منكم يلتقط صورة الضيف
سويلم بن مريبد
بعض العرب والله ما عندهم كار
والطيبة ماهم على مستواها
ان جت كلمة طائشة دون معيار
كلمة سفيهن قالها ثم نساها
أما قريبن منك والا بعد جار
مصيبتن ماينعرف وش دواها
ان قلت له يا أفلان يلزمك الاعذار
زودن على خطاه قام يتباها
كأنك تركته شب في مهجتك نار
والنار تحرق ما وقع فيه سناها
والناس على الناس بالهرج تجار
ولا ينعرف صدقانها من عداها
أحد يقول اضرب على الموقف الحار
وكلن على ما قيل يلقى جزاءها
واحد يقول اصبر على كل ما صار
و ترى الصبر محمود في منتهاها
و ابا النصيحة يا بعيدين الأنظار
من الرجال اللي بعيد مداها
سويلم بن مريبد
يا لادمي ما دام توجد بك الروح
حاول تتوب بنصح ولا انت رايح
تراك لا بدك عن الارض ممسوح
شريحتك تمسح و تمسح شرائح
ولا بد ما جسمك على الأرض مسدوح
ولابد ما تلقي على الارض طايح
و تراك يامن مت ما ينفع النوح
ولا يرجع اللي مات كثر النوايح
شف المرض بالناس يجوحهم جوح
وشف البشر تنشال مثل الذبايح
أبنصحك يالقرم وأرجوك لي اوح
نصيحتن كأنك تحب النصائح
سويلم بن مريبد
أما انت صادقني على حسن نية
والا انت فارق لا تجيني ولا اجيك
أنا ما أحب أهل العزوم الرديه
مشبكين الهرج بالكذب تشبيك
أنا خوي اهل العزوم القوية
ساعة معي خنجر وساعة معي شيك
وصداقة أمدحني وعطني هدية
صورة مع الخضره وصورة مع الكيك
لا هو خوين لي ولاني خوية
ولاني بصفق مع فريق الصعاليك
سويلم بن مريبد حبيب الجعفري.
بعض العرب شجيع على القريبين
وجبان لاشاف الرجال البعيدة.
ياشفت زوله قلت شيخ السلاطين
و ان جو له العدوان مايرفع أيده
وقت القسى يصير شيخ المساكين.
و وقت الرخاء الجبان ينفك. قيدة.
بالكذب والبهتان يذبح ملايين.
عزي للي من كان هذا عضيده.
سويلم مريبد الجعفري.
بديت باللي يعلم السر والغيب.
الواحد اللي كلنا عابدينه.
عساه يجنبنا عن الذنب تجنيب.
وانه يمشينا على فرض دينه،.
ويا علم الطيب تستاهل الطيب
. ياعل من سماك تسلم يمينه.
يالوافي اللي قايمن بالمواجيب.
راع المواقف والعلوم الثمينه
يامكثرن للضيف كثر التراحيب.
ومن كثر ذبح الحيل حمرن يدينه.
مدربن نفسه على الطيب تدريب.
و ترى الكريم معان والله يعينه.
الشاعر سويلم بن مريبد الجعفري
