بديت باسم الواحد النافع الضار
سبحان من سير جميع المخايل
الواحد اللي عالمن كل الاسرار
أمر عباده باتباع الفضايل
جبت القلم والبوك وأحضرت الافكار
أبتفنن في جزيل المثايل
و سلام ياربعي طويلين الاشبار
بكم افتخر من بين كل القبايل
ياحزامي المامون ياشبة النار
لاقالوا فلانان وفلان عايل
يا اهل الشجاعه والكرم واهل الكار
وعند البطولة تاخذون الاوايل
انتم ياربعي كلكم نقوة احرار
نعمٍ بكم ياكاملين الخصايل
فعولكم دايم على الراس تذكار
تضرب بكم الامثال والشك زايل
فعولكم تبين بالموقف الحار
ليا انتخوا في ناقضات الجدايل
جعافرة ربعي ليا صار ماصار
وبفعولكم تراي عندي دلايل
أول دليل اكرام للضيف والجار
وثاني دليل انتم هلٍ للجمايل
وثالث دليلٍ ياطويلين الاعمار
فعولكم ماتنحصي بالرسايل
نصيحتي تجنبوا بعض الاشوار
والشور الغادي دوروا له بدايل
عند التكاتف قوة الخصم تنهار
قل بتكاتف يصبح الجمع هايل
وعند التفرق ينتصر كل غدار
لو العدد واجد غديتوا قلايل
لاتتبعون دروب عامر وعمار
من طاعهم يضيع نص القوايل
وكل القبايل طيبهم مابه انكار
يوم المعارك بين صايل وجايل
وصلاة ربي عد كلمات الاذكار
على الرسول اللي مشى بالعدايل
